الثلاثاء، يناير 29، 2008

عــــــــــــــــــــــدنـــا


خرجت ..........!!

إنت خرجت إمتى ؟؟

إنت خرجت إزاى ؟؟

مبروك الخروج

كل واحد يقابلنى بيقولى حاجة من الكلام إللى فات ، إما مندهش أو مستفسر أو مستعجب أو فرحان بالخروج .

كل ده عشان انا أخدت قرار من النيابة بالإفراج عنى و عن عمرو أيوب ( أصغر إتنين في القضية سنا ) ، رغم إن ده طبيعى جدا لأن مفيش قضية أصلا عشان نتحبس عليها ،لكن إللى كان ديما في بالى هو:

انا كنت محبوس و بقيت حر ، و لا انا حر و بقيت محبوس ، و لآ انا محبوس و فضلت محبوس برضه !

و عشان متعبش حد معايا .........

و عشان أريح دماغكم من التفكير .......

الجواب الصحيح :

أنا كنت محبوس و فضلت محبوس برضه .

لأن حتى في السجن فيه مخبرين ، و فيه ممنوعات فكرية ، ممنوع إختلاط الجنائيين مع الإخوان عشان الجنائيين محدش يأثر عليهم !، ممنوع التحدث مع أيمن نور و مرتضى منصور ، ممنوع الإقتراب من المهندش خيرت الشاطر و إلا التهديد بالويل و الثبور و عظائم الأمور ، ممنوع تعدى الخط ده ، و ممنوع تمشى في المكان ده .

كل ده طبيعى جدا في رأى

لأنك في سجن !

لكن ما انا دلوقت و انا خارج أسوار السجن لدى نفس الممنوعات بنفس العقلية التى فرضتها .

على العموم ........

مبروك على الخروج

و مبروك ليكم برضه

فكل واحد دخل السجن عشان رايه و طلع منه هو إنتصار لكل الراغبين في العيش أحرار في مصر .

بالفعل كانت تجربة مثيرة .

استفدت منها كثيرا.

كثيرا

أكثر مما يتخيل البعض .

لكن من الحاجات إللى أنا طلعت بيها من التجربة ده أنها قربت ليا ناس انا كنت بعيد عنهم ، منها عمى الدكتور أحمد عبدالرحمن صاحب مستشفى مكة التى وافقت على إستضافت قتيل الفيوم ، و رفض وقتها كل الضغوط من أجل التكتيم على واقعة التعذيب و أصر على الجهر بكلمة الحق رغم كل الظروف ، و منهم عبدالرحمن فارس إللى كل مقابلاتنا كانت على السريع ، و كانت كلها سياسة في سياسة ، و كلها هموم و مشاكل عن مصر و الفيوم و إللى بيحصل في البلد ، و بالطبع لا يمكن أن أنسى ماقام به من أجلى ، الغريب في الأمر إننا لما كنت بنتقابل كان لدى شعور إن عبدالرحمن هو إللى هيعتقل قبلى و عشان كده كنت دايما حامل هم انا ممكن أقدمله إيه وقتها ، لأنى كنت حاسس إنه عاوز جهد كبير منى عشان أرد له بعض من المجهود الكبير إللى بيقوم بيه ، دلوقت بعد كل إللى عمله عشانى مش بحاول أفكر انا ممكن أعمل له إيه ، لأنى مهما فكرت مش هعرف أرد له بعض مما قام به ، عشان كده انا بطلت تفكير في الموضوع ده !!

و من ضمن الناس إللى قربوا منى جدا ....."المدونيين" .

الناس إللى وقفت معايا رغم إنها لا تعرفنى و لا شافتنى ، و ممكن كمان تكون مختلفه معايا فكريا و سياسيا ، الشباب دول هما أمل مصر الحقيقى بعيدا عن المثقفين "المتكلسين " و السياسيين "المتحجريين " .

الشباب إللى الأفكار فى راسه "طازة" و لسه جديده ، و إللى ديما في حركة دائمة ، و إللى قاردين على إستيعاب الأفكار الجديده و التعامل معها و الإستماع للأفكار المخالفه .

بجد

هما دول الأمل .

طبعا مدونى الفيوم على رأس القائمة ، لأنهم كانوا أصحاب الجهد الأكبر .

إستفدت إيه تانى من التجربة دى .....

ممممممممممم

كتير مش عارف أقول إيه و لا إيه

لكن إللى انا عارفه دلوقت إن فيه فكره في دماغى إنى اكتب كل إللى مر بى من يوم القبض إلى يوم الخروج .

بكل التفاصيل

بكل الأفراح

بكل الأحزان

بكل الدروس المستفاده

ربنا ييسر و أقدر اعمل حاجه زى كده .

بس لو إنتو مهتمين تعرفوا إيه إللى حصل معايا

فالمطلوب منكم إنكم تدعوا لى إن ربنا ييسر لى الوقت و الجهد عشان أكتب الكلام ده فى تدوينات .

و بالطبع ده لو حصل فمعنى كده إن السلسه إللى انا كنت بدأت فيها قبل الإعتقال عن دروس التغيير ( تدوينات مولانا عدنان مندريس ،دروس التغيير من أوكرانيا ، دروس التغيير من أمريكا الاتينية ) هتتوقف إلى حين إشعار أخر .

سلام دلوقت عشان أسلم على الضيوف .

هناك 9 تعليقات:

عبدالرحمن عياش يقول...

الف حمد الله على السلامة يا دكتور
ان شاء الله تكون تجربة مفيدة
و تحكي كتير عن اللي حصل
ربنا يفرج عن كل اخواننا
ربنا يفرج عن مصر كلها

سمية-بنت البنا- يقول...

السلام عليكم ورحمة الله وبركاته



حمدا لله على عودة حضرتك سالما

ربنا يتقبل ويجعله بميزان حسناتكم باذن الله


نحن بانتظار تجربة حضرتك


ربنا يبارك فيكم ويوفقكم لما فيه الخير

عمرو عزت يقول...

حمد الله على السلامة يا مستكشف

في انتظار ما ستكتب

الحياة السعيدة يقول...

مع السلامة يا باشا . وخلى بالك من الضيوف
والف حمد لله على السلامة .
وربنا يجلعه فى ميزان حسناتك
ragabhpl

صوت من مصر يقول...

اول حاجه مع انى مش اخوانى وان دى اول مره اتشرف ويكون لى الشرف انى دخلت البلوج الجميل ده
هى القضيه ايه انا مش فاهم ولا هو استعباط سياسى ولا قانونى
عموما حمدلله على السلامه

المستكشف يقول...

ألف شكر يا عبدالرحمن على مرورك ، و ربنا ييسر و اجد الوقت إللى احكى فيه عن التجربة بالتفصيل .
سمية بنت البنا ، شكرا على المرور و عقبال الدكتور احمد قريبا إن شاء الله .
عمرو عزت ،دى اول مرة تدخل عندى على المدونه ، و اتمنى أنها متكنش أخر مرة ، طبعا انا متابع مدونتك من زمااااااااااان ، و كنت دايما معجب بيها رغم الإختلافات في التوجهات و الأفكار إللى بنا ، و ليله ما تم القبض على قررت إنى أحاول أن أبدأ معك علاقه تعارف على النت ، و بالفعل بعت لك رساله فيها عنوان المدونه الخاصه بى ، لكن القدر لم يمهلنى لأكمل المشوار ........ربما يكون كل ماجرى هو بداية لتعارف وثيق بيننا إن شاء الله.
الحياه السعيده ....الضيوف في الحفظ و الصون ، و عقبال كل إللى جوة السجن عشان رأيهم و فكرهم .
صوت من مصر ، القضية و ما فيها أنه إتقبض علينا عشان إحنا إخوان و ده إللى ظاهر قدام الناس لكن إللى ممكن يكون في السر و مش معلن إنه إتقبض علينا عشان كان فيه مجموعه منا قامت على كشف حاله تعذيب حتى الموت بالفيوم ، و إتعرضوا لضغوط كتييير عشان يسكتوا بس هما ماسكتوش . و القصة و ما فيها إن شاء الله هقولها قريبا على المدونه ، شكرا للمرور .

مصطفى محمود يقول...

معلش يا أحمد طلعوك بدرى بس تتعوض المرة الجاية إن شاء الله وتأخذ المدة كاملة 6 شهور حبس احتياطى بس يكون فى مزرعة طره غير كده لا

غير معرف يقول...

السلام عليكم ورحمة الله

حمدا لله على السلامة

أنتم أحرار داخل المعتقل وخارجه

منذ متى وهناك من يستطيع اعتقال وسجن فكرة...أنتم الأحرااااااااااااااار

تقبل الله

منتظرين ملخص التجربة لمن لم يحالفه الحظ بمثل هذه التجربة

ثبتنا الله وإياكم

غير معرف يقول...

صباح النور اخي احمد
حقيقة لم اكن لاتعرف على مدونتك الا من خلال الحملة الي اتعملت علشان تطلع من الحجز.
بالرغم من اني اكون مختلف سياسيا و اديولوجيا معك اخي محسن الا انه كلنا مهما اختلفت الطرف و الوسائل نحاول قدر المستطاع اننا نقول لا للاقصاء و التهميش لا للتفقير و التجويع الممنهج ضد شعوبنا الكادحة و بنقول ان سلطة الاستبداد مهما طولت اكيد سياتي يوم تكون فيها نهاية
الف حمد الله ع السلامة
و الاعتقال اخي بشوفو انو وسام شرف معلق على صدرك
تحياتي
"مدونة احزان لا تنتهي"triste7.maktoobblog.com
assafo anaroze